Jan
2011
15

抖吓氣

呢三個月都係跟一個自己都想像唔到咁大嘅 project,難得老闆俾我玩,我就一腳踢自由發揮。當然做到半死咁滯,個腦搾乾搾淨,對住白紙寫唔出字,對住個 mon 更加連 game 都唔識玩。

宜家仲喺公司,對住個 mon,悶悶哋搵郭富城嚟聽,然後㩒吓 Facebook。睇咗 H 篇文〈麵粉櫈仔棉被紙盒膠袋阿妙〉,嘩!個腦通番有好多嘢想同佢講。好喇,就揼低篇 VO script 唔好鬼理一陣,當抖吓。

我同 H 唔同,屋企冇乜玩具,細佬加埋我儲埋好多年都係得一個鞋盒咁多。細個時問媽媽拎張白紙,媽媽會走去撕張日暦紙俾我,想要多張就要等第二日。之後有一日,媽媽走入房搵嘢,拎咗一細疊A4紙出嚟,再揀咗一張俾我同細佬。我同細佬興奮到傻咗,即時拎晒啲鐵皮車仔出嚟諗吓有乜好玩。我同細佬一人兩架車喺張紙上面車嚟車去,玩嘅時候梗係會講兩句嘢喇,咁咪講吓故仔囉:Snoopy 今日去探 Charlie Brown,沿路見到 Woodstock 梗係帶埋佢去喇⋯⋯

第二日我哋又拎啲車仔同張 A4 紙出嚟,咦,不如畫地圖囉!咪搵把間尺度吓度吓,畫咗好多間屋俾 Snoopy Woodstock Charlie Brown,一人一間,仲有車房添。咁又玩咗一個月。媽媽久唔久俾多架車仔我哋,結果我哋有兩隻 Snoopy,佢哋住隔離屋㗎。不過地方開始唔夠,媽媽又拎多兩張白紙俾我哋。我同細佬論論盡盡咁用膠紙駁埋兩張紙,反轉畫個大地圖。

嗰年新年過後,我哋得到批准動用利是錢買咗個六層高塑膠停車場連油站,有埋升降機㗎。我哋又畫過張新地圖,連接停車場出入口。玩具鞋盒當然放唔落個停車場喇,媽媽俾咗個街市賣荔枝嘅疏窿膠箱俾我哋,玩完收埋推入床下底。

宜家大咗,諗嘢「懶」係複雜咗,不過都係頂唔順啲複雜遊戲,例如細佬嗰啲成寸厚攻略嘅電腦遊戲,我寧願自閉玩吓 minesweeper jeweled!。呢世人買過三部遊戲機,iPod touch 喺 iPhone 4 推出後借咗俾同事做測試;後繼機 iPhone 4 裏面有幾版遊戲,因為之前做過好多 iPhone game music 嘛,不過最近冇時間玩,做農夫種親都係 24 小時嗰啲先唔會枯。至於最後一部就係黑色 Wii,買嚟為咗喺屋企玩 Wii Fit Plus 當做運動,當然你都估到我有幾多時間開佢嚟玩喇。

唉!都係繼續寫 VO script 如果唔係今晚點錄音⋯⋯

當然如果宜家俾我揀,我都寧願問媽媽拎兩張 A4 紙,畫吓公仔傾吓計⋯⋯

Related Posts with Thumbnails
 

Leave a Reply